ZORAM TODAY| 26th June, 2024 (Wed): Nimin khan June 23, 2024 (Pathianni) zana Lawngtlai Vengpuia in kang vanga nunna chante leh in chhiate hnena sawrkar aṭanga zangnadawmna (ex gratia) leh Chief Minister's Relief Fund aṭanga chhawmdawlna te chu Lawngtlai District Bawrhsap Cheemala Siva Gopal Reddy, IAS chuan lusun chhungte leh chhiat tawkte kutah a hlan.

Lawngtlai District DC chuan chhiatna thleng chu pawi a tih thu leh chhiat tawkte a tuarpui tak zet thu sawiin, chhiat tawh kara tlawmngai pawl, khawtlang hruaitu leh mipuite tlawmngaihna leh thawh hona lang chhuak chu chhuanawm a tih thu a sawi a. Sawrkarin zangnadawmna hlan tur rang taka a tifel thei chu thuneitute hnenah lawm thu a sawi.

In kanga nunna chan mi pahnih, A. Sungṭiali (kum 76), H. Thangnawna (L) nupui leh H. Darhliangi (kum 70), H. Thangnawna (L) farnu te ral nan an chhungte kutah DM&R Department hnuaia State Disaster Response Fund (SDRF) aṭangin ex-gratia ₹ 4,00,000/- (cheng nuai li) ve ve hlan a nih bakah, CM's Relief Fund aṭangin ₹ 25,000/- (cheng sing hnih sang nga) ve ve hlan a ni.

He kangmei chhuak vanga chenna in pahnih -  H. Thangnawna (L) in leh Lalruatsanga in - chhia zangnadawm nan SDRF aṭangin in neitute hnenah ₹ 1,30,000/- (cheng nuai khat sing thum) ve ve hlan a ni bawk.

June ni 23, 2024 (Pathianni) zan khan Lawngtlai Vengpuia  H. Thangnawna (L) in, Assam type chu bungrua eng mah chuh hman lohvin a kang ral a, vanduaithlak takin mi pahnihin nunna an chan a. He kangmei chhuakin a nghawngah hian a ṭhenawm chiaha awm Lalruatsanga in chu a chhe tel nual bawk.